كانت محروسة وصارت مهروسة، والهرس شغااااال على ودنه، بفضل النظام اللي حاكمنا ـ وبيحكم علينا ـ ركب النظام فرس الهرس وقاعد يهرس كل اللي يقابله أو يقف ضده، أو حتى يشاور عليه بصوابعه، ولأن بطونهم امتلأت واتكرشت وبالملذات تشبثت، وعلشان يحافظو على حجم الكروش واطالة العروش لازم لهم ناس تساندهم.. وتسندهم.. ليهم مصالح بردوا.. منتفعين يعني.. ياكلوا نصيبهم من التورتة الثورية، ويهبشوا لهم هبشة متينة وقوية، إشي فلوس وإشي فلوس وإشي مناصب وإشي مصالح وأراضي وشركات وشاليهات والنهب على كيف كيفك...
وهما دول "هراس" مصر المهروسة ـ على فكرة أنا موش سوداني مع إني بحب السودان ـ لأ أنا مصري وقصدي المهروسة المهروسة موش المحروسة يعني "مصر والسودان كانوا هتة واهدة".. هراس مصر المهروسة واللي كانت من زمااااااااااااااااان أوي أوي أوي محروسة بجد بفضل الله ونخوة حكامها ومكانشي فيه هتّيفة.. يهتفوا للنظام وحلاوة النظام وحسني النظام وجمال النظام عمال على بطال لأ... كان زمان رجالة بينصحوه وهو يسمع كلامهم لأنه كان قوي وتقي.. مش ضعيف وصاحب مصلحة.. زي الملك الصالح ومحمد علي.. ودلوقت مصر بتتهرس كل يوم حتة جديدة ومن جوانا موش من بّرانا، العدو مننا قصدي علينا، قصدي كان مننا واصبح مُسلط علينا، بيعمل كل اللي هُمّا عايزينه من غير ما يبذل عدونا أي جهد، ولكنه بيدعمه ويشجعه، وعدونا للأسف واحد، وجوه مختلفة وأقنعة مهترئة، عدونا هو الاستبداد والظلم والفساد، والانحلال، والقهر، وسفك الدم وهرس البلد ونهب خيرها وحب غيرها، عدونا كان مننا.. عدونا نظامنا اللي للأسف لسه بيحكمنا...!
علشان كدة إحنا جينا
No comments:
Post a Comment